LA ME PATRIA

di Turi Lima


La me patria è sta terra ca mi fici,
unni jittài lu primu lamentu,
unni l' aceddi vòlanu filici,
unni chiù chiaru è lu firmamentu.
La me patria su' st' àrvuli ciuruti;
stu mari azzurru, lìmpidu e lucenti,
li glòrii di li sèculi pirduti,
è Mungibeddu ccu lu focu ardenti.
La me patria è la fami, è lu duluri
di stu pòpulu sempri marturiatu,
sunu li peni, sunu li turturi
e li làcrimi amari c' ha' jittatu
sutta la mmorsa di lu sfruttaturi:
e a sta patria ci dugnu lu me ciatu.


Fonte : A Rarika